So i dì 25, 26 e 27 de otobre de 2019 el CEVEP el ga partessipà del XXIII Incontro dei Difusori del Talian a Nova Erechim, Santa Catarina. El evento l’è stà organizà par a Associassion Italiana Véneta de Nova Erechim, insieme con a Associassion dei Difusori del Talian – ASSODITA, a Federassion dee Entità Ìtalo-Bresiliane e de Maestri e Ufissi dea Cultura Taliana – FEIBEMO, e a Federassion dee Associassion Ìtalo-Bresiliane del Rio Grande do Sul – FIBRA. A partecipassion del CEVEP so’l evento el ze stà ‘na oportunità par raforsar a importansia del Paranà so’l universo bresilian dea ‘éngua Talian come Referénsia Culturae Bresiliana.
Co a conferénsia “El CEVEP come possibilità par sostegner el Talian del altopiano curitibano”, se ga parlà: dea stòrgia dea imigrassion italiana so’l Paranà; dei segni de identità taliana sun questa tera; dei lauri fati par mantegner viva a cultura taliana scuminsiai ancora so’l ano de 1958; el Paranà so’l Inventàrio Nassionae del Talian e el laoro del CEVEP so’e coeónie paranaense.
El Incontro, che gien fora ‘na volta par ano, el ga sucedesto con ‘na sbrancà de conferénsie sora el património culturae dea imigrassion italiana, con a presentassion dee esperiensie par sostegner e menar avanti el Talian so’l nostro paese, e anca na sena, fiò e riunion del Comitato Nassionale de Gestion de la Léngua Talian e dea ASSODITA. A pròssima edission del evento sarà par a prima volta so’l Paranà, so’a sità de Coeombo.
El CEVEP ze un grupo de riserca iscrito so’l Conselho Nacional de Pesquisa – CNPq, sun 2018, formà par detenturi dea comunità ìtalo-bresiliana dee sità paranaense de Campo Largo, Colombo e Curitiba, con rapresentanti e risercaduri dea Università del Centro-Oeste del Paranà – UNICENTRO, Università Federal del Paranà – UFPR, Pontifìcia Università Catòlica del Paraná – PUC-PR, Istituto del Património Stòrico e Artìstico Nassionae – IPHAN-PR, Associassion Veneti so’l Mondo – Coeombo, Associassion Italiana Prete Alberto Casavecchia e Museo Cristòforo Coeombo. El riunisse gente de diferenti rami de studi come ‘Ètere e ‘Éngue, Creansa, Stòrgia, Architetura, Engegneria, Comunicassion, Design e Giurisprudensia. El ga come ogetivo registrar, descriver e studiar el Talian palà so’a Region de Colonisassion Taliana del Paranà, par medo dea Sociolenguìstega. Tuti i so partessipanti i ze volontari e i lauri del grupo i ze gratùiti, sensa guadagnar soldi.
El Talian l’è ‘na dee autodenominassion par a ‘éngua de eransa vegnesta fora par medo de un insieme de ‘éngue de imigrassion del norte dea Itàlia in contato tra de ee e co’l portoghese del Brasie. So’e coeónie dea Region de Colonizassion Italiana so’l Paranà, el ze ‘na Koiné che a gran parte a ze véneta, soratuto vissentin e del trevisan in contato tra de iuri e co’l portoghese del Brasie, co so pròpie caraterìstiche, vegneste fora dea diversità bresiliana, che a fa diferente del véneto originae.
El Talian l’è stà ricognossuo in 2014 par el IPHAN/MinC come Referénsia Culturae Bresiliana.